გიორგი კვერნაძე იანვარში რომაში ვერ გადავა

როგორც RomaPress იტყობინება La Gazzetta dello Sport-ზე დაყრდნობით, გიორგი კვერნაძე რომას ინტერესის სფეროში მოექცა, თუმცა ფროზინონე ქართველი ვინგერის იანვარში გაშვებას არ აპირებს. ამდენად, შესაძლო მოლაპარაკებები ზაფხულის სატრანსფერო ფანჯრამდე გადაიდო.

გიორგი კვერნაძე სერია A-ში გამოირჩევა

2003 წელს დაბადებული მარცხენა ფლანგის თავდამსხმელი სეზონის დასაწყისში სპეციალისტებს აოცებს. 11 მატჩში მან 3 გოლი გაიტანა და 5 საგოლე გადაცემა შეასრულა, რამაც რამდენიმე კლუბის ყურადღება მიიპყრო.

რომას მთავარი მწვრთნელი ჯან პიერო გასპერინი ისეთ ვინგერს ეძებს, რომელიც გუნდს სისწრაფეს, ფიზიკურ ძალასა და გოლებს შემატებს. ქართველი ფეხბურთელი სწორედ ამ კრიტერიუმებს აკმაყოფილებს და ჯალოროსების ხელმძღვანელობის მოკლე სიაშიც მოხვდა.

ფროზინონე იანვარში კვერნაძეს არ გაუშვებს

გამოცემის ცნობით, კვერნაძით დაინტერესებულნი არიან როგორც გასპერინი, ისე დ’ამიკო, თუმცა ფროზინონეს პოზიცია მტკიცეა — სეზონის შუა პერიოდში კლუბი მოთამაშეს არ დათმობს. ამიტომ რომა ქართველ ვინგერზე საუბარს ზაფხულში დაუბრუნდება.

ენდრიკი და გიტენსი — რომას იანვრის ფავორიტები

იანვრის ფანჯრისთვის რომა სხვა ვარიანტებსაც განიხილავს. ყველაზე სავარაუდო კანდიდატებად რეალ მადრიდის ბრაზილიელი ენდრიკი და ჩელსის ვინგერი ჯეიმი გიტენსი სახელდებიან.

წყაროს თანახმად, ენდრიკი უფრო მიმზიდველ ვარიანტად მიიჩნევა, ვიდრე გიტენსი, რომელსაც ბოლო წლებში სხვადასხვა ფიზიკური პრობლემა აწუხებდა. რაც შეეხება გიორგი კვერნაძეს, მისი რომაში გადასვლის თემა, სავარაუდოდ, ზაფხულში განახლდება.

მეტი სიახლე: რომა · გიორგი კვერნაძე · ჩელსი · სერია A

წყარო: RomaPress

წყარო: RomaPress