როგორც UFC-ის ოფიციალური საიტისთვის სტივ ლატრელი იტყობინება, მძიმე წონის პერსპექტიული მოკრივე დამაზიონ ვანჰაუტერი 7 ნოემბერს ლონდონში, Zuffa Boxing 12-ის ფარგლებში, ივან ბალაზს დაუპირისპირდება. ბრძოლა Copper Box Arena-ში გაიმართება.
21 წლის ამერიკელი, რომელიც ფლორიდის ქალაქ სენტ-პიტერსბერგიდანაა, მუჰამედ ალისთან ერთ დღეს — 17 იანვარს — დაიბადა. მისი მიზანიც დიდია: სურს, ყველა დროის საუკეთესო მძიმეწონოსანი გახდეს.
დამაზიონ ვანჰაუტერი და სამი ნოკაუტი Zuffa Boxing-ში
ვანჰაუტერს პროფესიონალურ რინგზე 13 ორთაბრძოლა აქვს გამართული და დამარცხება ჯერ არ უნახავს. Zuffa Boxing-ში გადასვლის შემდეგ ის ერთადერთი მოკრივეა, რომელმაც სამივე მეტოქე ვადამდე დაამარცხა.
- თებერვალში — ჯულიან გომესზე გამარჯვება ტექნიკური ნოკაუტით მესამე რაუნდში;
- მაისში, ZB06-ზე — რაფაელ მერფიზე გამარჯვება ტექნიკური ნოკაუტით პირველ რაუნდში;
- სექტემბერში, გარსია–ბენის საღამოზე — რაფაელ აკპეჯიორის ნოკაუტი პირველ რაუნდში.
ამით ვანჰაუტერმა ნოკაუტით ზედიზედ შვიდი ბრძოლა მოიგო, კარიერაში კი ასეთი გამარჯვება უკვე ათი აქვს.
მოთმინება და სისწრაფე
მოკრივის თქმით, ის ყველაზე მეტად ფსიქოლოგიურად გაიზარდა. პირველი ბრძოლის წინ ძალიან ნერვიულობდა, ახლა კი უფრო მშვიდი და მომთმენია. მისივე სიტყვებით, ნერვიულობა მხოლოდ მომზადების პერიოდში აწუხებს.
„როცა რინგში ვარ, სხვა არაფერი მრჩება, გარდა იმისა, რაც მიყვარს — მეტოქეს ტკივილი უნდა მივაყენო“.
ვანჰაუტერი სიმაღლითა და მკლავების სიგრძით ხშირად ჩამორჩება მეტოქეებს, თუმცა ეს მისთვის პრობლემა არ არის. ის ამბობს, რომ ყველა მასზე ნელია და საკმარისია, ფეხებით იმუშაოს. საინტერესოა, რომ კარიერა 2022 წელს 155 ფუნტ წონაში დაიწყო, აკპეჯიორისთან ბრძოლის წინ კი სასწორმა 231,5 ფუნტი აჩვენა.
დამაზიონ ვანჰაუტერი ივან ბალაზის შესახებ
ახალ მეტოქეზე ამერიკელი დიდად არ ფიქრობს. მისთვის საკმარისია, რომ ბალაზი ჯონი ფიშერს შეხვდა და კარგი რეკორდი აქვს.
„მე მხოლოდ იმაზე ვარ ფოკუსირებული, ვისაც მომიყვანენ. უბრალოდ მითხარით, ვის ვებრძვი“.
მეტი სიახლე: MMA
წყარო: UFC (official)
