როგორც სიდ ლოუ The Guardian-ში წერს, ტენერიფეს თავდამსხმელი ხესუს დე მიგელი ხუთშაბათს ლა-მანჩაში, მისი ოჯახის სოფელ ნავაერმოსაში, დაკრძალეს. სოფელში სულ 3 587 ადამიანი ცხოვრობს, თუმცა იმ დღეს მისი ვიწრო ქუჩები ხალხით აივსო და სრული სიჩუმე სუფევდა.
როგორ დაიღუპა ხესუს დე მიგელი
ორშაბათს, მეორე დივიზიონის მატჩის 96-ე წუთზე, 30 წლის ფორვარდი ანდორას მეკარეს, ხესუს ოვონოს, შეეჯახა. ექიმები მოედანზე ექვსი წუთის განმავლობაში უწევდნენ დახმარებას, სასწრაფო დახმარების მანქანაში პულსი აღუდგინეს, საავადმყოფოში კი სუნთქვაც დაუბრუნეს.
ღამით მისი ნევროლოგიური მდგომარეობა გაუარესდა და დილის 8 საათზე ფეხბურთელი გარდაიცვალა. წინასწარი აუტოფსიის თანახმად, სიკვდილის მიზეზი გულმკერდის ტრავმა, ე.წ. commotio cordis, გახდა. შემთხვევაზე სტანდარტული გამოძიება დაიწყო, რომელიც სამედიცინო პროტოკოლის დაცვასაც შეისწავლის.
ფეხბურთი ერთად დაემშვიდობა
დაკრძალვას ესპანეთის ნაკრების მთავარი მწვრთნელი ლუის დე ლა ფუენტე, რეალ მადრიდისა და ატლეტიკო მადრიდის პრეზიდენტები, ანდორას მფლობელი ჟერარ პიკე და ესპანეთის მასშტაბით კლუბების წარმომადგენლები დაესწრნენ. ტენერიფეს ფეხბურთელები და პერსონალი სრული შემადგენლობით ჩავიდნენ.
„ტკივილის წუთებში ფეხბურთი ყველაზე მეტად ერთიანდება“, — თქვა დე ლა ფუენტემ.
ცერემონიას ესწრებოდა სევილიის ნახევარმცველი გიორგი ქოჩორაშვილიც — დე მიგელის ყოფილი თანაგუნდელი, რომელმაც ამისთვის კლუბს ნებართვა სთხოვა. სევილიის მწვრთნელმა ლუის გარსიამ აღნიშნა: „უპირველეს ყოვლისა, ჩვენ ადამიანები ვართ“.
ტრაგედიის შემდეგ
ესპანეთის ფედერაციამ მეფის თასის ყველა მატჩი გააუქმა. ლა ლიგამ კი გადაწყვიტა, რომ ტურის თამაშები ჩატარდება, გარდა ტენერიფეს, ანდორასა და დე მიგელის ყოფილი კლუბის, კასტელიონის, მატჩებისა — მიუხედავად იმისა, რომ ფეხბურთელთა კავშირი თამაშების შეჩერებას ითხოვდა.
ხესუს დე მიგელს ცოლი მარია და 16 თვის ქალიშვილი კლარა დარჩა. ტენერიფეს უმსხვილესმა აქციონერმა რაიკო გარსიამ პირობა დადო, რომ კლუბი გოგონაზე მუდამ იზრუნებს. შაბათს კი ტენერიფეს სტადიონზე ყველასთვის ღია სამგლოვიარო ღონისძიება გაიმართება.
მეტი სიახლე: რეალ მადრიდი · ბარსელონა · ატლეტიკო მადრიდი · ლა ლიგა
წყარო: Sid Lowe (The Guardian)
