როგორც Manchester Evening News იტყობინება, 59 წლის ასაკში გარდაიცვალა მანჩესტერ სიტისა და ოლდემ ათლეტიკის ყოფილი თავდამსხმელი დარენ ბეკფორდი. ცნობა მისი გარდაცვალების შესახებ 8 ნოემბერს რამდენიმე ყოფილმა კლუბმა სოციალურ ქსელებში გაავრცელა. გარდაცვალების მიზეზი ჯერჯერობით არ დაუსახელებიათ.
დარენ ბეკფორდი — მანჩესტერ სიტის აკადემიის აღზრდილი
მანჩესტერში დაბადებული ფორვარდი სიტის ახალგაზრდულ გუნდში ჩამოყალიბდა, ძირითად შემადგენლობაში კი დებიუტი 1984 წელს, სულ რაღაც 16 წლის ასაკში, ჰქონდა. შემდეგ იჯარით ითამაშა ბერსა და პორტ ვეილში, 1987 წელს კი ვეილში საბოლოოდ გადავიდა.
პორტ ვეილში გატარებული ოთხი წელი მისი კარიერის ყველაზე სამახსოვარ პერიოდად იქცა — ამ ხნის განმავლობაში მან 150-ზე მეტი მატჩი ჩაატარა. ნორიჯში ორწლიანი ეტაპის შემდეგ, 1993 წელს, ოლდემმა იგი 300 ათას ფუნტად შეიძინა. „ბაუნდარი პარკზე“ ბეკფორდმა 52 მატჩში 11 გოლი გაიტანა.
1996 წელს ოლდემიდან წასვლის შემდეგ შოტლანდიურ ჰარტსში გადავიდა და თავისი გოლით ხელი შეუწყო გუნდს შოტლანდიის ლიგის თასის ფინალში გასვლაში. კარიერის ბოლოს მოკლე ხნით გამოდიოდა ფულჰემში, უოლსოლში, რაშდენ ენდ დაიმონდსში, საუთპორტში, ტოტალ ნეტვორკ სოლუშენსში, ბერსა და ბაკაპ ბოროუში. მისმა ძმამ, ჯეისონ ბეკფორდმა, 80-იანი წლების ბოლოს სიტის შემადგენლობაში 20-ზე მეტი მატჩი ჩაატარა.
კლუბები და გულშემატკივრები ემშვიდობებიან
დარენ ბეკფორდი გულშემატკივრების საყვარელი ფეხბურთელი იყო რამდენიმე ადგილობრივ კლუბში, მათ შორის სიტიში, ოლდემსა და ბერიში. მანჩესტერ სიტიმ X-ზე განცხადება გამოაქვეყნა:
„მანჩესტერ სიტი ღრმად დამწუხრებულია ყოფილი მოთამაშისა და აკადემიის აღზრდილის, დარენ ბეკფორდის გარდაცვალებით — ის ნამდვილად ჩვენიანი იყო“.
სამძიმარი გამოთქვეს ოლდემმა და პორტ ვეილმაც. ვეილის განცხადებაში ნათქვამია:
„ის სამუდამოდ ვეილის კაცად დარჩება“.
სიტის გულშემატკივარმა Mark McCarthy-მ გაიხსენა, რომ ახალგაზრდა ბეკფორდი თანატოლ პოლ მოლდენთან ერთად შთამბეჭდავ შემტევ დუეტს ქმნიდა და ორივეს დიდ მომავალს უწინასწარმეტყველებდნენ. მისი თქმით, დარენი სამუდამოდ დარჩება მეხსიერებაში როგორც ნიჭიერი ფეხბურთელი, რომელსაც გოლის გატანის ბუნებრივი უნარი ჰქონდა.
მეტი სიახლე: მანჩესტერ სიტი · პრემიერ ლიგა
წყარო: Manchester Evening News
