როგორც Marca-ს ჟურნალისტი Rocío Guevara იტყობინება, გიორგი ქოჩორაშვილი სევილიის ბოლო ვარჯიშს არ დაესწრო. ქართველ ნახევარმცველს ამის ნებართვა კლუბმა მისცა — ის Jesús de Miguel-ის დაკრძალვაზე იმყოფებოდა.
ქოჩორაშვილს ცერემონიაზე სევილიის ოფიციალური ელჩი Pablo Blanco ახლდა. ანდალუსიური კლუბი პარასკევს, 21:00 საათზე, რამონ სანჩეს-პისხუანზე ალავესს უმასპინძლებს.
გიორგი ქოჩორაშვილის გარეშე ჩატარებული ვარჯიში
მატჩის წინა დღის სავარჯიშო სესია სევილიამ საკუთარ სტადიონზე ჩაატარა. მოედანზე გამოვიდა ისააკ რომეროც, რომელიც მარცხენა მუხლზე დამცავით ვარჯიშობდა და გარსია პლასას ხელმძღვანელობით ჯგუფთან ერთად სრულ დატვირთვას ასრულებდა.
თავდამსხმელმა ხეტაფესთან მატჩის შემდეგ ტკივილს უჩივლა და მთელი კვირა ინდივიდუალურად ვარჯიშობდა. რომერო სევილიის საუკეთესო ბომბარდირია — ცხრა მატჩში სამი გოლი აქვს გატანილი.
გუნდთან ერთად ივარჯიშეს კიკე სალასმა და იუსუფ ფოფანამაც. ორივე, სავარაუდოდ, პარასკევს ძირითად შემადგენლობაში გამოსასვლელად მზად იქნება, თუ ამას მწვრთნელი საჭიროდ ჩათვლის.
სევილიის დანაკლისები ალავესთან მატჩში
რომეროს დაბრუნების შემდეგ გარსია პლასამ სქემა უნდა შეარჩიოს: ორი თავდამსხმელით ითამაშოს თუ სამი ნახევარმცველის სისტემას დაუბრუნდეს. ლა ლიგის მე-12 ტურში სევილია პეკეს გარეშე დარჩება — ის ტრავმის გამო მომდევნო ერთი თვის განმავლობაში ვერ ითამაშებს.
სამედიცინო შტაბის მეთვალყურეობის ქვეშ იმყოფებიან მარკაო და მიგელ სიერაც, ხოლო მანუ ბუენო ვიტორიელებთან შეხვედრას დისკვალიფიკაციის გამო გამოტოვებს. რაც შეეხება გიორგი ქოჩორაშვილს, მისი არყოფნა მხოლოდ პირადი მიზეზით იყო განპირობებული, წყარო კი რაიმე პრობლემაზე არ საუბრობს.
მეტი სიახლე: გიორგი ქოჩორაშვილი · ფეხბურთი
წყარო: Marca
