როგორც MMA Fighting-ის ჟურნალისტი Jed Meshew იტყობინება, ილია თოფურია პედი პიმბლეტს კიდევ ერთხელ დაუპირისპირდა და განაცხადა, რომ მზადაა The Ultimate Fighter-ის შოუში ინგლისელის წინააღმდეგ მწვრთნელის როლში გამოვიდეს. ორ მებრძოლს შორის დაძაბული ურთიერთობა წლებია გრძელდება, თუმცა ოქტაგონში ერთმანეთს ჯერ არასდროს შეხვედრიან.
ილია თოფურია და პიმბლეტი: გზა გაიხსნა
გასულ წელს, როდესაც თოფურიამ მსუბუქი წონის ტიტული მოიპოვა, პიმბლეტი ოქტაგონში ავიდა და ორთაბრძოლის იდეა წამოაყენა. ეს ბრძოლა არ შედგა: ქართველ-ესპანელმა მებრძოლმა პირადი მიზეზების გამო პაუზა აიღო, პიმბლეტი კი იანვარში დროებითი ტიტულისთვის ბრძოლაში ჯასტინ გეითჯისთან დამარცხდა.
მოგვიანებით, UFC White House-ზე, ტიტულების გაერთიანების ბრძოლაში გეითჯიმ თოფურიაც დაამარცხა. ახლა კი ორ მეტოქეს შორის შეხვედრას აღარაფერი უშლის ხელს.
The Ultimate Fighter — ჯერჯერობით მხოლოდ ჭორი
ABC.es-თან საუბრისას ილია თოფურიამ აღიარა, რომ შოუს შესახებ ჭორები სმენია, თუმცა UFC-სთან ამ თემაზე ჯერ არ უსაუბრია. მისი თქმით, ამჟამად მთავარი ვარჯიშებზე დაბრუნება და კარგი ფორმის შენარჩუნებაა. ოფიციალური ინფორმაცია UFC-ის ინტერესის შესახებ ჯერ არ არსებობს, თუმცა ამ იდეის მომხრეა პიმბლეტიც, რომელიც მიიჩნევს, რომ ისინი შოუს რეიტინგს აღუდგენდნენ.
თოფურიამ მეტოქე არ დაინდო და განაცხადა:
„პედი, პედი, პედი… სოსისივით შევჭამ!“
მისი შეფასებით, პიმბლეტი პარტერში მასთან ერთ ქულასაც ვერ მოიგებს, ვერც ძირს ჩამოაგდებს და ვერც დაცვას გაივლის. ქართველმა მებრძოლმა ინგლისელი გეითჯის შეადარა: ამერიკელი გამოცდილი და არაპროგნოზირებადია, პიმბლეტს კი, მისი სიტყვებით, არც ნოკაუტის დარტყმა აქვს და არც მოულოდნელი ილეთები.
მახაჩევთან ბრძოლა ისევ დღის წესრიგში?
„მატადორის“ აზრით, თუ პიმბლეტთან ბრძოლა შედგება და ის შთამბეჭდავ გამარჯვებას მოიპოვებს, შესაძლოა, ისევ აქტუალური გახდეს ისლამ მახაჩევთან ნახევრად საშუალო წონის ტიტულისთვის ბრძოლა, რომელიც გეითჯისთან მარცხის გამო ჩაიშალა.
„შენ იმდენად კარგი ხარ, რამდენადაც შენი ბოლო ბრძოლა“
ასე შეაჯამა ილია თოფურიამ საკუთარი პოზიცია.
მეტი სიახლე: ილია თოფურია · MMA
წყარო: MMA Fighting
