როგორც Mundo Deportivo იტყობინება, ხოან ლაპორტამ ატლეტიკო მადრიდის ხელმძღვანელობასთან ტრადიციულ სადილზე ხულიან ალვარესის ტრანსფერის მცდელობის თემა საბოლოოდ დახურა. ბარსელონას პრეზიდენტი შეხვედრაზე დანიშნულ დროზე თხუთმეტი წუთით ადრე მივიდა.
ლაპორტამ განაცხადა, რომ ორ კლუბს შორის ურთიერთობა როგორც ინსტიტუციურ, ისე პირად დონეზე კარგია და ბარსელონას სურს, რომ ასე გაგრძელდეს. მისი თქმით, ურთიერთობამ რთული პერიოდი გამოიარა, თუმცა პატივისცემა ორმხრივია.
ხოან ლაპორტა: თემა ამოწურულია
არგენტინელ თავდამსხმელზე საუბრისას ბარსელონას პრეზიდენტი მოკლე და მკაფიო იყო:
„ის ატლეტიკო მადრიდის ფეხბურთელია და არა ჩვენი“.
ლაპორტამ დასძინა, რომ ბარსელონას მწვრთნელმაც და დიეგო სიმეონემაც დაძაბულობა განმუხტეს, ამიტომ საკითხი დახურულია. მან ისიც აღნიშნა, რომ რაფინიას პოზიციის შეცვლა ალვარესის ტრანსფერის მცდელობასთან დაკავშირებული არ ყოფილა. ბრაზილიელი, რომელმაც ახლახან კონტრაქტი გააგრძელა, მისი სიტყვებით, ძლიერი „ცხრიანია“, მთელ მოედანზე მოძრაობს და თავის პოზიციაზე მსოფლიოში საუკეთესოა.
სერესომ ლაპორტას მხარი დაუჭირა
ატლეტიკოს პრეზიდენტი ენრიკე სერესო ხოან ლაპორტას პოზიციას შეუერთდა. მისი თქმით, ალვარესის საკითხი ბარსელონასთან თავის დროზე მოგვარდა და ამაზე საუბარი აღარ ღირს — ფეხბურთელმა ყველაფერი მოედანზე უნდა დაამტკიცოს. სერესომ ბარსელონა ევროპის ერთ-ერთ საუკეთესო, თუ არა საუკეთესო, გუნდად მოიხსენია.
გულშემატკივრების რეაქციაზე სერესომ თქვა, რომ ფანები თავისუფლები არიან და თუ რამის თქმა სურთ, იტყვიან. ალვარესის „პატიების“ შესახებ კითხვას კი ხუმრობით უპასუხა:
„საუკეთესო პატიება გოლია? ორი გოლი და გამარჯვება“.
სადილს ბარსელონას მხრიდან ლაპორტასთან ერთად რაფა იუსტე, ელენა ფორტი, ფერან ოლივე, ჟოზეპ იგნასი მასია და ჟაუმე ნიკოლასი დაესწრნენ, ატლეტიკოს მხრიდან კი — სერესო და დირექტორთა საბჭოს წევრი დავიდ ვილია. მიგელ ანხელ ხილ მარინი შეხვედრას არ დაესწრო, თუმცა საღამოს „მეტროპოლიტანოს“ ლოჟაში იქნება.
მეტი სიახლე: ატლეტიკო მადრიდი · ბარსელონა · ლა ლიგა
წყარო: Mundo Deportivo
