როგორც Guilherme Cruz MMA Fighting-ისთვის იტყობინება, ბრაზილიელი ნორმა დიუმონი UFC-ს შორდება. 36 წლის მებრძოლმა ეს ამბავი სამშაბათს სოციალურ ქსელში გაასაჯაროვა. ოქტაგონში 13 გამოსვლის შემდეგ მან ორგანიზაციას კონტრაქტის შეწყვეტა თავად სთხოვა და თანხმობაც მიიღო.
რატომ დატოვა ნორმა დიუმონმა UFC
დიუმონის თქმით, კონტრაქტით მას კიდევ ორი ბრძოლა ჰქონდა დარჩენილი. თუმცა ჯერ კიდევ ბოლო ორთაბრძოლამდე იცოდა, რომ UFC შეთანხმებას, სავარაუდოდ, აღარ გაუგრძელებდა. ამიტომ მიხვდა, რომ დარჩენილი ორი ორთაბრძოლით სატიტულო ბრძოლამდე ვერ მივიდოდა.
ბრაზილიელი არ მალავს, რომ კარიერის დასრულებაზეც ფიქრობდა. მას თავის მეგობართან, UFC-ის საშუალო წონის მებრძოლ მარკო ტულიოსთან ერთად ოჯახის შექმნა სურს. წყვილი შეთანხმებული იყო, რომ დიუმონი მომავალი წლის ბოლომდე, შესაძლოა, უფრო ადრეც, სპორტს დაემშვიდობებოდა.
დიუმონი UFC-ში გატარებული რვა წლისთვის მადლიერია. მისი სიტყვებით, სწორედ აქ ააშენა კარიერა და შეცვალა როგორც საკუთარი, ისე ახლობლების ცხოვრება.
9 გამარჯვება 13 ბრძოლიდან
UFC-ში დიუმონის რეკორდი 9-4-ია. მის აქტივშია გამარჯვებები ჟერმენ დე რანდამიზე, ირენე ალდანასა და კეტლენ ვიეირაზე. თუმცა ორგანიზაციას ის ზედიზედ ორი მარცხის შემდეგ ტოვებს — ჯოსელინ ედვარდსთან და აილინ პერესთან მან ორივე ორთაბრძოლა მსაჯების გადაწყვეტილებით წააგო.
ნორმა დიუმონი კრივში გადადის?
Chute Boxe-ის წარმომადგენელი სპორტს ჯერ არ ტოვებს და 2027 წელს ბრძოლებს განაახლებს. მას ერთ-ერთი მსხვილი საკრივო პრომოუშენი დაუკავშირდა, ხოლო სხვა MMA ორგანიზაცია სატიტულო ორთაბრძოლას სთავაზობს. დიუმონის თქმით, ფინანსურად ორივე ვარიანტი მომგებიანია.
„ვაღიარებ, რომ ცოტა უფრო კრივისკენ ვიხრები. მგონია, მომავალ წელს რინგზე მნახავთ“.
ამასთან, ბრაზილიელმა დასძინა, რომ დეტალებს ჯერ ვერ ამხელს — მოლაპარაკებები ისევ მიმდინარეობს და კონფიდენციალურია.
მეტი სიახლე: MMA
წყარო: MMA Fighting
