როგორც CBS Sports-ის ჟურნალისტი Sam Quinn იტყობინება, ვიქტორ ვემბანიამამ CBS News-ის გადაცემა „60 Minutes“-ს ვრცელი ინტერვიუ მისცა. სან ანტონიო სპერსის ფრანგი ლიდერი ახალი სეზონის დასაწყისში საკუთარ კარიერაზე, ცხოვრების წესსა და შარშანდელ ფინალზე ისაუბრა.
ვიქტორ ვემბანიამა სპონსორებსა და ჯანსაღ ცხოვრებაზე
ფრანგი ცენტრი სპონსორების შერჩევისას ყოველთვის მომთხოვნი იყო — მან ადრეც განაცხადა, რომ გაზიანი სასმელების მწარმოებელ კომპანიებთან არასოდეს ითანამშრომლებს. ინტერვიუში მან აღნიშნა, რომ NBA-ის ვარსკვლავს შეუძლია, თავად აირჩიოს, ქველმოქმედი იქნება თუ აზარტული თამაშებისა და ალკოჰოლის რეკლამის სახე. მისი არჩევანი ჯანსაღი ჩვევების პოპულარიზაციაა, რაც ადამიანებს ცხოვრებას გაუუმჯობესებს.
ფინალი, ფოლები და „ბოროტმოქმედის“ იმიჯი
გასულ სეზონში სპერსი პირველად გავიდა NBA-ის ფინალში, სადაც ნიუ-იორკ ნიქსთან ხუთ მატჩში დამარცხდა. უხეშმა ფოლებმა — ჯერ მინესოტა ტიმბერვულვზთან, შემდეგ კი ნიქსთან — ვემბანიამა ბევრი გულშემატკივრის თვალში ბოროტმოქმედად აქცია. მეხუთე მატჩში ჯეილენ ბრანსონზე მისი ფოლი ბევრმა ფლაგრანტად მიიჩნია, მეექვსე შეხვედრაზე კი დისკვალიფიკაციაც შეიძლებოდა დამუქრებოდა.
„ეს, უპირველეს ყოვლისა, ჩემი ზღვრები დამანახა“, — აღიარა ვემბანიამამ.
მისი თქმით, მოედანზე კალათბურთი უნდა ითამაშო და არა მეტოქეები სცემო, თუ, რა თქმა უნდა, გამარჯვება გინდა.
ფეხშიშველა ვარჯიში
ვემბანიამა ცდილობს, რაც შეიძლება ხშირად იაროს ფეხშიშველა და მინიმალისტური ფეხსაცმელი ატაროს. ის მიიჩნევს, რომ მაღალ კალათბურთელებს ფეხებთან დაკავშირებული პრობლემები ყოველთვის აწუხებდათ, ძლიერი ტერფი კი სწორ პოზას განაპირობებს და მუხლს, მენჯსა და ზურგს იცავს. ერთხელ ის ვარჯიშზე ფეხშიშველა მივიდა, რამაც ერთ-ერთი ახალბედა გააოცა.
ცხოვრება ამერიკაში და პოპოვიჩის გაკვეთილი
ვემბანიამა აშშ-ში სამ წელზე მეტია ცხოვრობს, თუმცა, მისი თქმით, ჩვეულებრივი ამერიკელივით არ ცხოვრობს. დადებით მხარედ იმას მიიჩნევს, რომ ამბიციის გამო აქ არავინ განგსჯის, უარყოფითად კი — სხვა ქვეყნებთან შედარებით უფრო ზედაპირულ ურთიერთობებს.
ყოფილი მთავარი მწვრთნელისგან, გრეგ პოპოვიჩისგან, რომელიც ინსულტის შემდეგ პენსიაში გავიდა, ვემბანიამამ თავმდაბლობა ისწავლა:
„გამარჯვების შემდეგ იშვიათად ხარ ისეთი კარგი, როგორიც გეგონა, მარცხის შემდეგ კი — იშვიათად ისეთი ცუდი“.
სპერსმა ახალი სეზონი ორი მარცხით დაიწყო, თუმცა შემდეგ ზედიზედ ოთხი გამარჯვება მოიპოვა და ახლა ტიტულის მთავარ ფავორიტად მიიჩნევა.
მეტი სიახლე: ტოტენჰემი · კალათბურთი
წყარო: CBS Sports NBA
